私家產檢

        好耐無寫BOLG啦，講下自己嘅近況先，11月12日嗰日去咗私家嗰邊做產檢，2小B一切正常，醫生話2小B女而家大約重2磅幾，如果進展一直良好去到生嗰時2小B應該會有5、6磅，如果係咁就太好啦，我最近聽好多孖B媽咪講返嘅經驗都係唔足月出世，好擔心B女嘅健康，希望2小B一直叻叻落去，未到36週都唔出嚟住HAHA，同埋我私家產檢已經再無找DR.SO啦，因為佢無期同我接生，不過佢都好好，最後一次產檢時都好有耐性同我講要注意D咩，小心D咩，唔好做D咩，同埋我之前睇新聞發現原本劉華夫婦都係睇DR.SO咖，DR.SO咁叻又一D架子都無，我都好有幸自己誤打誤撞之下遇到呢一位好醫生。不過話說回頭，喺DR.SO到做產檢係超超超貴，我嗰次喺佢自己診所做產檢，埋單要$2100，我心尺到呢，事後我同老公講返，好采SO醫生唔同我接生，如果唔係咁落去要破產...哈哈哈

        講返我而家睇嗰個私家醫生係朋友介紹的，叫盧永傑醫生，朋友剛剛找佢接生完都唔錯，手細幾好，產檢收費亦算合理，大約$800到，我原本唸住如果DR.SO唔幫我接生我就會去QE生，之但係係因為我一直以為我孖胎QE會同我開刀，但原來唔係我，我問QE佢話一般情況下係要我自然生，唔得先會開刀，經過我地一段時間嘅考慮後決定唔博，所以決定去私家找盧醫生幫我開，當然2小B要夠36週先可以去私家生啦，如果唔係都要去返QE的，所以我前兩日去咗仁安落咗一萬元訂留床位，又幾好喎，仁安嗰到話，如果到時我36週前生的話係一定要去返政府生咖嘛，咁佢地會退返$9000比我咖喎，唔錯唔錯，用$1000買多個保險令我安心咗好多^^