終結第一次ivf費用

第一次ivf正式結束啦，係失敗嘅結束，驗血佈告亦已出了，好在無事，昨日痛到行都行唔到，第一次痛到想死，個子宮好似想爆開咁，好驚訝，所以我忍唔住一次過食左4粒特效必理痛，嗰刻痛到真係唔理得咁多，食完之後就好小小啦，但亦輪到d藥可能勁過頭，開始有d雲雲地同想嘔，仲有m小姐又無啦啦無咗，我嗰刻亂到死，好驚自己係宮外孕喎，好采最後無事，周醫生話我可能之前用藥嘅關係所以塞住左，只要m小姐流到出嚟就無事咖啦，果然係...之後m小姐再出現返，痛嘅感覺亦慢慢好起來了....
  
 總結第一次 ivf嘅費用先:
IVF PACKAGE $88000
驗血 (女) $900
 驗血 (男) $800
 抽卵當日麻醉師   $4000
抽卵當日吊蛋白2支(ALBUMIN)    $2000 
 雪胚胎(1年費用) $8800
再吊2支蛋白(ALBUMIN)  $2000 
 驗孕    $100
葉酸    $50
  總數=$106,650-

結束第一次IVF

   M小姐今日終於都出現啦，個夢發完啦，要醒啦，一見到M小姐第一時間打去偉澤，唸住聽日唔洗返去驗血啦，點知姑娘要我返去驗都唔知仲驗嚟仲咩，不過算啦，返就返啦....
   聽日要問清楚姑娘嚟梗要點做，幾時再可以開始第2次IVF先...要幾錢...點解今次失敗....知唔知失敗原因....下次再做又有縛多機會呢....但係唸唸下問嘅好像全部係廢話...無人會答到我呢D問題囉應該=_=
    個肚而家開始劇痛呀help....有咩留返第日再講....我而家只係想講%$*&@^%*#

等待中

今日M小姐還未來，但m痛依然存在，我已沒有什麼期望了，只是想m小姐快d來，令我能夠有個新開始，我唸係用藥嘅關係，所以m小姐未出現，如果星期三還未見m小姐，我去唔去偉澤驗血好呢? 我唸我會去驗的，因為費用已包括埋，至於我支驗孕捧我係唔會用咖，無謂浪費金錢。
  今日個天氣令到我覺得極之眼訓，好想放假，好想訓覺，好想去血拼買嘢，衫、褲、鞋咩都想買，但係為左生小孩已經洗了很多錢了，所以唔想咁大洗，為有忍啦，因為下次放胎又唔知要用幾錢啦.....呢個世界咩都講錢，點到我唔現實呀，洗錢容易搵錢難，雖然我喺我d朋友當中已比較幸運嘅一個，唔洗為錢煩惱，但係亦唔係老豆老母大把錢嗰d，我和老公今日所有嘅全部係我們努力辛苦搵回來的血汗錢，亦好采奶奶曾經幫過我們一把，所以洗咁多錢當然係會肉尺啦，如果到最後成功嘅真係咩都值返晒，但如果.......唉.....唔好唸...

等待M小姐來臨

到今日為止m小姐前嘅陣痛依然存在，我唸今次嚟m一定極之痛，我而家只想m小姐盡快出現，唔好折磨我，如果你已準備出現，請盡早出現比我死心。

    今日心情依然沈重，個心依然好實唔舒服，由其上fb見到朋友仔一家3口嘅相片，唔知自己有無咁嘅機會，還有一些朋友係大住肚咁過生日，覺得呢個生日好特別，因為已經感覺到bb同佢一齊過生日啦，我都下個月生日，我都好想能夠有個咁特別嘅生日，我真係好羨慕呀，我覺得佢地好幸福呀，呢個感覺，呢種幸福我何時會有....等待中

什麼都沒有了

今日陣陣嘅m痛feel依然強烈，一大早去見勞醫生，我同勞醫生講返我呢兩日什麼肚脤都沒有了，成個人好像輕晒咁，只係得返d m痛feel，醫生隨即話oh....唔係好事，再同我照肚，佢話係喎真係咩都無晒，都照驗下孕啦，我話好當然驗完出嚟都係無啦，姑娘就叫我28號再驗，話而家早左幾日可能唔準，我知道呢d都係安慰我嘅說話，我亦都無放在心，只係唔明白中間有咩問題令到bb無法成長=.=

    唔開心一定有，但又無好好好唔開心，我都估唔到今次嘅失敗自己可以咁平靜，無想喊嘅感覺，只係個心有d唔舒服，唔開心，同埋今日唔係咁想返工，我唸我個期望一早放晒落下一次放胎身上，我一早有心理準備知道唔會係一次就得，如果一次就中嗰d真係好好好好采，所以今次先可以咁平靜，反而我睇得出老公唔係咁開心，因為由day 1 開始佢就覺得做ivf一定得，仲要係一放落去就得，所以佢滿有信心之下咪好失望囉，仲問我點解會咁，我真係答你唔到，我都想知....=-=

  醫生話今次唔中要停一個月，即係話要2013年先做可以放雪bb啦，都好，呢個月我要好好放縱大吃大喝...哼...

放胎後的-第9天

  今日心情非常非常之沈重同低落，因為由昨晚開始到而家所有肚脹無晒，隨之而來嘅係一陣陣嘅 M痛feel，我同我d朋友講，佢地話就算有左都會有谷M feel，但我自己好清楚呢種唔係谷m feel，係嚟m前就開始痛嗰種feel，我雖然知道ivf唔會係一次成功，心裡明白，但到要接受現實時確係困難，亦唔想去接受。

   明天要返勞醫生到覆診，其實已經唔想返啦，知道就嚟都嚟m仲返咩呀，浪費時間。之前睇嗰個水晶佬話我今年一定唔會有bb，唔通又比佢講中，我相信嘅係上帝，點解又要去睇水晶佬，係因為當初嘅迷失，既然係咁又何必在意他的說話，但事實又的確在意，矛盾....

放胎後的-第8天

   今日一早去見勞醫生，佢照完我個肚之後話好多水，要返偉澤到吊兩支蛋白，我同佢講前日個肚仲係30，昨日就31，今日已經係32啦，個肚好像想爆咁，成晚頂住好痛所以訓得唔係咁好，不過如果係好事我一d都唔介意咁唔舒服囉haha...醫生話吊完蛋白會好好多，話我而家肚脹可能係之前打嗰支安胎針影響，如果吊完蛋白之後無再脹呢代表我唔中獎，如果吊完仲有小小脹就係中咖啦

   結果去偉澤吊嗰兩支嘢又要$2000，星期六又要見醫生，28號返偉澤驗血，緊張萬分呀，頭先經過萬寧忍唔住買左支曼仔驗孕棒先返工姑娘叫我唔好偷驗，但係我見d sis全部都偷驗都好準嘅，所以唸住26號偷驗下，其實勞醫生比左好大信心我，但係到現在為止所有大肚婆嘅積像都無，所以都唔敢唸得太開心住.....
 

放胎後的-第7天

由琴晚開始我個肚就一直谷到而家，好開心有呢個感覺，但又唔比自己太開心，怕希望大失望大啦，所以不停同自己講肚谷亦唔代表D咩，今日打左比勞醫生，話比姑娘知個肚好谷，姑娘叫我明早10點要比醫生睇下，我當然無問題啦，睇下醫生講咩先....

   昨晚同老公D同學仔食生日飯，見有個同學嘅老婆個肚已經好大啦，見到佢個肚又羨慕又開心，希望下次同佢地出嚟食飯大肚嗰個係我啦佢地仲比左D超聲波BB相我睇，但我完全唔識睇，只係識睇一張，就係影BB嘅性別，呢張我一睇就明，因為係仔仔嚟咖，所以好易睇WAKAKAKA.....

放胎後的-第6天

 今日個肚依然未有咩動靜，仲未有肚谷嘅感覺，呢兩晚都有用熱水浸腳，希望盡下人事啦...幫補一下....bb 加油呀

今日有位朋友SEND信息比我，我睇完之後個心都沈左一沈，呢個朋馳就係當人同我一齊睇水晶佬，亦都係我第一編所寫嘅BOLG迷信，當日我同呢個FD去睇呢個水晶佬，佢會計完之後會話我地知點點點....其中一樣就係話我呢個FD會無左一個BB，當時聽完都不以為意，事隔一個月到嘅今日，我呢個朋友同我講佢有左，本來係一仵好開心嘅事，點知醫生話佢係宮外孕，要立即做手術仲要切左一邊嘅輸卵管，真係點會咁咖，事後個FD仲要講返比個水晶佬講中左，我先醒起...真係有D驚驚

放胎後的-第5天

    今日返勞醫生到覆診，去到個姑娘問我有無肚谷谷嘅反應，我話無，姑娘再問個肚有無唔舒服，我就再答姑娘除左有時有一兩下肚吉吉之外其他咩感覺同反應都無，姑娘個樣係有個問號有d唔相信亦有d奇怪咁，我見佢咁樣自己都有d擔心，我夠竟係咪已經無機會啦....

等左一陣終於見到勞醫生啦，醫生都係問我有無肚谷，我亦如實答無啦，跟住醫生就幫我照個肚，佢話我子宮內膜有20咁厚所以都ok喎，只要係厚過之前就ok，我當然其實唔係好明啦，但我照答醫生:哦!係呀!
醫生話我去偉澤打半支安胎針就可以啦，如果過兩日個肚谷住谷住呢就代表係中左，如果咩反應都無呢就唔中囉，下....咁樣好緊張囉呢兩日會，BB你比d反應媽咪啦....你要努力加油呀!

   最後醫生叫我星期六反去覆診....再睇下點喎.............

放胎後的第4天

   到今日為止都無咩太大感覺喎，除左個肚有時吉吉地之外，無sis所講嘅肚谷、胸脹、胸痛、多尿、大食，咩都無

  

放胎

終於喺11月14日放咗胎啦，最後用得嘅共有11個，有7個g1，4個g2，醫生話恭喜我有好多g1，好多都好靚 今次用咗1個，仲有嗰10個就雪住佢留返下次用，希望生完先再用啦，雪胎費用一年要$8800，我放完胎後休息咗2日無返工。
    到現在為止無好大嘅感覺，我自己都比平時小心，行路又慢d，坐底又輕力d之外都無咩特別，同埋個肚有d吉吉地，條腰有d痛，希望一次成功啦。

    19日，星期一返去見醫生，可能要打安胎針，希望一齊都順利啦........

抽卵

昨日去左偉澤抽卵，共抽到18粒卵，明天就放胎啦，而家心情十分緊張，醫生話因為我抽得多卵，怕我個肚會太脹，所以明天只可放一個胎，仲好，唔洗煩放一粒定兩粒haha，希望一切順利順利啦。BB...BB...我聽日帶你返屋企啦...
  昨日老公要放精，最終都係決定喺屋企搞掂攞過去，當完成左之後就快快出門口啦我地，老公話今日有d緊張，所以比較耐先搞掂，仲話好采無喺嗰到交，如果唔係可能仲緊張，點都好啦，都成功交完功課，安樂晒!
  而家要放鬆心情，等待明天

母親的抉擇

   今日又見勞醫生，勞醫生幫我照旦、抽血後已鐵定11月12日抽卵，醫生問我想放一個定兩個胎，呢個問題已困擾我2天了，又想放兩個感覺多個機會，又驚咁好采兩個中晒自己駝唔穩，因為自己身體又唔係十分健康又唔係好唔健康，不過自己又有輕型地貧及血色素偏低喎，所以真係心大心細，十五十六...頭痛

另一樣嘢就係偉澤姑娘問我抽卵當日要唔要麻醉，不過麻醉要加$4000，又考起我啦，我真係唔知要唔要喎，醫生話我聞完氣就瞓左，之後就會做抽卵，但姑娘又話驚我痛醒，所以要麻醉師在場，

打針

     自從前日見完勞醫生之後開始一日打兩針，個肚好多地方已經有傷口，有輕輕嘅痛，今日打針已經開始唔知打邊個位好，我開始明白到之前睇bolg sis講嘅感受同感覺，我開始擔心失敗後嘅路，我開始明白點解d sis失敗左之後會想休息兩三個月什至乎更長嘅時間先再開始，因為想等個肚d傷口復原?還是日日要打針隔日要覆診所以好累?還是再害怕面對失敗?我相信好多好多樣嘢加埋嘅傷害，所以要休息。
  有時自己會唸，人地生仔咁容易，自己要洗咁多錢受咁多苦都好，無問題，我亦都唔介意個過程有幾辛苦，我只係想要個美滿嘅結果，唔知上天會唔會比我呢?

    明天又要霞診啦，勞醫生話照埋聽日旦旦就可以決定到幾時抽卵啦.....望一切都順利啦
  

覆診

   今日返左勞醫生到覆診，今日勁多人去睇，多人到連位都無得坐，好彩好快就到我啦，醫生今日同我照下旦旦嘅進度，問我呢幾日打針掂唔掂，我望住老公話係佢幫我打嘅，醫生問佢得唔得佢仲話無難度tim

    醫生一路照旦旦一路比我同老公睇，其實我唔太睇到，因為下面有d唔舒服，所以不能太專心睇，不過醫生就話我唔係咁多旦旦，每邊有5-6粒旦旦，不過佢話唔洗加藥，佢話已經夠旦旦啦，係佢心目中想要嘅數目，太多唔好喎，但我就唸如果多d旦旦就可以雪多d，穩陣d麻，因為如果一用晒d旦旦又要再比$88000好甘咖呢，希望唔須要啦!

   講返呢幾日打完針又無咩唔舒服肚谷谷喎，好采姐，仲唸住會有d唔舒服，跟住醫生又同我講我還是早期，只打了幾日針，唔會有太大感覺喎。11月5號又要返去比勞醫生照旦旦，醫生話如無意外11月10號會抽旦旦，好緊張呀，嗰日仲要係老公生日tim，呢個生日真難忘haha總之而家要放鬆放鬆再放鬆